مشاهد

المشهد الأول

الأيام الماضيه كانت ذكرى الثورة (ثورة 23 يوليو) ..

ولست بصدد الكلام عن مميزات الثوره و عيوبها والكلام اللي شبعنا منه اليومين اللي فاتو..

بس قبل ما أبدأ اللي أنا عايز أقول كلام قاله الأبنودي لمصطفى بكري في أحد البرامج ومعنى الكلام ..

إن الثوره لما قامت كانت علشان توقف فساد الملك وكنا نعرف إن فساد الملك يعني كاسين ويسكي وسهره على الأوبرج إنما بالوضع اللي احنا فيه فكاسين الويسكي أرحم -ده هو اللي بيقول-..

ولا أستطيع إلا أن أقول الله يرحم عبد الناصر..

أما بالنسبه للكلام اللي أنا عايز أقوله ..

فكلنا شئنا أم أبينا سمعنا أو فرض علينا سماع الأغاني الوطنيه الكتير أوي القديمه اللي كلماتها وطنيه بجد ..

المهم أنا مش هتكلم عنها كأغاني وموسيقى وحكم الغناء والموسيقى والغناء بدون موسيقى لأن الكلام ده له ناسه وسبق وقلت أنا مش شيخ..

إنما أنا عايز أتكلم عن حاجه لفتت نظري قوي..

كنت لما بسمع كلمات أغنيه من دول بلقى نفسي فاهم كلماتها ومستصيغه كقصيده شعريه وكلمات ليها معنى وهدف ..

كلمات كاتبها شاعر ومغنيها واحد صوته حلو بجد ..

صوته أعلى من الموسيقى ..

لا تشعر بهيافته أ وهيافة مستمعيه ..

وكمان تجد الناس شباب وكبار كانو بيسمعوا وبتعجبهم النوعيه ده..

أما دلوقتي ..(فعاديك ياخووويه)-سوري حته بلدي- تلاقي خير اللهم اجعله خير خبط ورقع ونهيق وزعيق وصويت وجعير و..و.. وكل حاجه عاليه ..ولغه غريبه كأنها لغة ناس من كوكب تاني مش معانا ..

وتسأل هو فيه ايه؟..

زلزال..لأ..بركان..لأ..حد كبير مات..لأ.. حد تنحى..برده لأ..أمال فيه إيه بس ؟.. خضتوني.. يرد عليك واحد كده شكله غريب ..

متعرفش واد ولا بنت لابس جينز وسلسله وأنسيال (صح كده)..

وشكله هو كمان من كوكب تاني عشان كده فاهم اللغه الغريبه بتاعتهم ..

المهم يرد ويقولك ..

دي الأغنيه الجديده الشديده اللزيزه الروشه مووووت بتاعة المطرب (اعتراض) الأموووووووور مووووووت العاطفي اللي..اللي...( سيد قلّه)-ده اسمه- أو شيء من هذا القبيل ..المهم .. تسأله انت فاهم حاجه تلا قيه خلاص مش فايق يرد عليك ..أصل البتاعه (الأغنيه) سطلته .. ويسيبك ويمشي يدندن مع نفسه بنفس اللغه اللي انت مش فاهمها برده ..

المهم ..خلاصه الكلام ..ان التدهور والإنحطاط وصل لكل حاجه حتى الأغنيه والقصيده الحلوه اللي الأصل فيها إنها تنفع تتغنى .. وذوق الناس اللي خلاص أصبح في الحضيض ..

وليه احنا نسيب شويه منهقين ..قصدي منعرين .. قصدي مطربين (اعتراض) ينزلوا بمستوى ذوقنا أوي كده ..

يلا خير اللهم لا اعتراض..

المهم الشيء المحترم بيعيش ويفضل طول عمره محترم ......

.......................................................................................................................................................................

المشهد الثاني

أثناء مروري بالسياره بأحد الشوارع وإذ بمن يجلس بجواري يخبرني برؤيته السريعه لسيده تفترش أحد الأرصفه نائمه في شارع عمومي

.. أنا قلتله جايز شحاته (واحده غلبانه)نايمه على الرصيف ..أثنا كده كنا عدينا مسافه كبيره بعيد ..وأنا مشفتش المشهد نفسه ..المهم قلتله لو مش شحاته وواحد تعبانه مثلا أغمى عليها أكيد في حد هيشوفها لأن الشارع عمومي والناس رايحه جايه فيه (سلبيه أنا عارف ).. المهم رحنا المشوار بتاعنا ..وبعد ثلاث ساعات وحين عودتي( وحدي هذه المره) مررت من نفس الشارع .. والمفاجئه إني شفت المشهد اللي كان قاللي عليه من كان يجلس بجواري لسه موجود والسيده ما زالت ملقاه على الرصيف ..

ماذا أفعل .. أترجل إليها وأرى ما بها .. أم سأجد مصيبه في انتظاري.. المهم طلعت الموبايل واتصلت بالإسعاف ..اللي الجراج بتاعه على بعد أمتار قليله في نفس الشارع المذكور وقلتله على الموقف وقاللي طيب هنطلع نشوفها ..وروحت.....

بعد لما روحت ..جلست أفكر .. ماذا فعلت ..أهي سلبيه .. أم خوف .. أم مفاجئة الموقف هي ما جعلتني أتصرف هكذا..وهل هذ التصرف صحيح أم غير منقذ لتلك المرأه لو كان يوجد ما يستحق الانقاذ ..

المهم رغم إني بكره السلبيه جدا .. وجدت نفسي جزء منها .. ولا أدري لماذا؟ ..هل هو جزء من سلبيه كبرى يحياها المجتمع ككل؟ ..أم سلبيه فرضت علينا بسبب الخوف المزروع فينا من ضياع الحقوق ..

بس نويت بعد كده إني هتدخل في أي حاجه ممكن أفيد فيها ولو بجهد ضئيل..

وخرجت اللي جوايه في شويه كلمات ناوي أعملها مطلع لقصيده كامله ..

لو كنت خايف راح تبقى سلبي

والحق عارفــه جواك مخــبي

والخوف يقولك ايـــاك تلبــي

قولّه لأ .. ده الحـــق عـــندي

.........................

خليك إيجابي خليك مفيد

والحق عنه إيـــاك تحيد

والظلم واجهه بإيـد حديد

راح تلقى دايما الدنياعيد

.....................

أسئل الله أن يستخدمنا جميعا فيما يحب ويرضى..

........................................................................................................................................................................

خلو المشهد الثاث والرابع للأسبوع القادم

هنسى ومش هحرق أعصابي

النسيان هو الحل

في البدايه أود الاعتذار عن عدم الكتابه الأسبوع الماضي ..

لأني كنت من المغضوب عليهم
ودخلوا مجزرة الباطنه اللي كلمكوا عليها محمود ربيع ..

ومش هتكلم عنها تاني وهمسحها من الذاكره وكان شيئا لم يكن ..

وهو انا هحرق أعصابي ليه ..

شوية درجات وكان عينهم فيهم اخدهم وأزور يعني ..

ولا أنا يعني صحتي مش غاليه عشان أضيعها على شوية باطنجيه- ((مع الاعتذار للباطنيين المحترمين))-وأجيب لنفسي ضغط وسكر وفي النهايه زباينهم تزيد واحد..

علشان كده مش هفكر في المجزره دي تاني مش سلبيه مني بس خوفا على صحتي ..

وعشان كده برضه بعد لما خلصت الإمتحان بيومين سافرت المصيف (راس سدر) ..

مش بقوللكوا هحرق أعصابي ليه..

بس برده اتحرقت..

طبعا راس سدر على طريق سيناء الغاليه وطبعا في بعد كده الغردقه وشرم و.. و.. من المدن اللي لينا وهي مش لينا..

وطبعا الأمن على الطريق والكماين حاجه كده زي عدد المطبات والحفر اللي في أي شارع في بلدنا الحلوه العزيزه اللزيزه (على رأي دكتور عندنا)..

وكل شويه كان الأتوبيس يقف ويطلع واحد ياخد الأتوبيس رايح جاي يبص في خلق الناس اللي فيه .. وطبعا لأني ربنا كارمني بحتة ذقن(لحيه) على ما قسم كده .. كنت أنا وأمثالي من الخلق اللي عليها العين.. ((يارب تفضل العين بس ..مايبقاش عليها حاجه تانيه))..

المهم..لقيتوا بصلي من أول الأتوبيس ودخل عليه كالصاروخ الموجه وقاللي ((رايح فين ياشيخ)) ..

أنا بقى بسمع كلمه شيخ دي بتعفرت وهقوللكوا ليه..

المهم فتح معايا تحقيق بسيط كده وجاوبته كله صح الحمد لله (آه مش هيبقى باطنه وتحقيق)

يووه برده جبت سيرة الباطنه تاني..

خلاص دي آخر مره..

المهم بعد كده قاللي (طيب..حمد الله على السلامه ياشيخ)..

شيخ تاني.. نهايته .. الحمد لله عدت على خير..

أنا مش معترض على الحفاظ على الأمن وسلامه بلدنا العزيزه اللزيزه..

بس اللي معترض عليه إن كان معايا في الأتوبيس شباب سبايكي ومسقطين البنطلون وكده ..

اشمعنى بأه أنا اللي أتسأل عن البطاقه ورايح فين وجاي منين ومش بعيد كنت اتاخدت طوارئ ..

وهو أمثالي بس اللي خطر على البلد وامثالي بس هم اللي مفروض تتحدد تحركاتهم ..

طب ما الشاب اللي بيبيع مخدرات مش مربي ذقنه .. واللي فاتح بيت مشبوه مش مربي ذقنه برده..

ماشي يتأكدوا من شخصية اللي مربي ذقنه بس برده اللي مش مربيها برده ممكن يكون خطر .. انما يبقوا موجهين كده ..

أول ما شاف على خدي حته سوده نسى الدنيا والأتوبيس والأمن وكل حاجه وجالي أنا ..ده حتى يبقى خلل أمني..

يلا خير..

أقوللكوا بأه أنا بتضايق وبيركبني مليون عفريت لما حد يقوللي يا شيخ..

أولا الشيوخ ثلاثه

1-شيخ شيخه القرآن

2-شيخ شيخه الزمان

3-شيخ شيخه الشيطان

وانا مش واحد منهم ..

ثم إن اللقب ده مسئوليه كبيره الواحد مش قدها ..

وكمان في ناس فاكره إن لما يقولوا للي قدامهم شيخ كده( بيثبتوه) يعني .. ومش هيقولهم لأ .. و.. و.. يلا خير..

برده هحاول أنسى ..

هو الواحد هينسى إيه ولا إيه أنا حاسس إن النسيان بقه صعب زيه زي التذكر وعشان كده دي قصيده كنت كتبتها عنم النسيان وإن الواحد مننا لازم ينسى الشر ويفتكر الخير وإلا مش هيعرف يعيش في الزمن الي احنا فيه ...

دع يوم أمس بمره لا حلوه.. انسى الهموم وجفف الأدماع

وادّكر منه ما يسر حياتك ..لا تذكرن ماهيج الأوجاع

إنما الماضي الأليم كحفرة ..ما زاده النقب إلا اتساع

نعمة حباها الله للورى.. أن جعل لهم من النسيان انتفاع

فذكر المرء حادثة مضت.. كطويه وسط الأمواج الشراع

فما حط بقاربه بر الأمان.. وما زاده ذكرها إلا ضياع

فاليوم يوم والأمس أمس ..وما غد إلا غائبا عن الأسماع

فكن حامدا عن يوم أمس.. واشكر ليومك لا تطع اطماع

وادع الإله أن يزدك في غد.. كذا الحياة إن تعشها متاع

ولا ترهقن نفسك في حسرة مضت.. وكن لنفسك إن تأمر تطاع

فلو وقف الجنود يبكون قتلاهم ..ما أمهلتهم سيوف العدا ارتجاع

والأسد إن تبكي فرار فريستها ..ما افترست غيرها وماتت جياع

ولو كل نازلة بالمرء حطت به.. لشل نفسه من ألم الصداع

هذا وإن الله علمنا صبرا ..وكلام الله حتما مطاع

فكن لله عبدا وأطع أمره.. فما نحن إلا لرسوله أتباع

وقل عند صدمة أولى إنا ..لله خلقنا وإليه يكون ارتجاع

فبشرى الصابرين في الدنيا عظيمة ..وفي الأخري لهم في الجنان البقاع

إنا لله و إنا إليه راجعون
وحسبي الله ونعم الوكيل

كليه للبيع

هذا الأسبوع رأيت تقريرا إخباريا بأحد القنوات عن شاب مصري تبرع بل (باع ) كليته لرجل سوداني..عمر هذا الشاب 22

هذا الخبر أثار لدي تساؤلات كثيره...؟

ما الذي دفع هذا الشاب لهذا الأمر؟

هل سيتكرر هذا الأمر مع آخرين؟

إلى أين يتجه بنا الحال؟
................
أولا ورد في تفاصيل الخبر أن عمر الشاب الحقيقي 17 وليس22 وأن الإتفاق تم بواسطه طرف ثالث(سمسار كلى) يأخذ الشباب لشقته ويتفق معهم ومنها الى غرف العمليات لتنفيذ (الجريمه) وهناك شباب غيره كثير....
..............
مثل هذا الشاب هل كان دافعه الفقر لعمل ذلك..وأي فقر يجعل الإنسان يبيع أجزاء جسده..لابد أنه باع قبلها أشياء كثيره وسيبيع بعدها أكثر..

ولكن ليس هذا مبرر..
هل وصل هذ الشاب إلى حاله من اليأس والاكتئاب لدرجه تجعله يضر نفسه مقابل المال..
شاب كهذا حكم على نفسه أن يعيش طيله حياته مريض بعد أن باع ما لا يملك..هل وصل مستوى ثقافتنا إلى هذا الحد..كيف استطاع أحد إقناعه بذلك..لابد أن الحياة كانت سوداء أمامه إما مديون أو جائع (لا يجد قوت يومه) أو..أو..

ومن هنا أبدأ........

لقد وصلنا لحال يبيع البعض فينا((ليس منا)) لحم بعض..( أصل لحمنا أرخص من البهايم )..

ينصب البعض فينا على عقول بعض..(أهو يلاقي حد يضربه على قفاه أمال هيضّرب وبس)..

لا يكاد البعض فينا يجد ضعفا في أخيه حتى ينتهشه ويستغله..(كضبع جبان لا يأكل فريسته إلا ساقطه)..

ياويل المسئولين عن هذا كل الويل..

ويل لمن ترك الشعب يجوع حتى أكل بعضه ..

ويل لمن ترك الشعب يفتقر إلى أن باع جسده..

ويل لمن ترك الشعب يضيع حتى وجده عدوه..

الكل أصبح يفر من الحياه بشكل أو بآخر..نفقد شبابنا بسهوله كأننا لسنا بحاجه إليهم..

يموت بعضهم غرقا أثنا محاولتهم الهجره(من الجحيم) إلى بلد آخر(الجنه في نظرهم)..

يموت انتماء بعضهم ويلجأون لإسرائيل ليبيعونها مواهبهم..

والبعض يعيش مقتولا..مدفون الموهبه .. دفين الفقر..أو يعيش في قبر الجهل..

يعني لا تعليم ولا ثقافه ولا دين ولا حاجه خالص..

قال تعالى..((كالأنعام بل هم أضل))

فعلا أضل...صدق الله العظيم

هو الأسد ممكن ياكل أسد زيه.. ولا الكلب ياكل كلب زيه ..

ادينا كلنا في بعض..وقرقشنا بعض كمان..

واحد زي السمسار ده..يجمع الشباب ويبيعهم بالقطاعي.((.ولا كانش فيه ناس عقلا يقولوا ايه الداعي))..

ده ازاي نعامله بعد كده كبني آدم..مننا وعلينا..ده أكيد مش معانا ولا مننا ..ده أكيد من الناس التانيين..

قال تعالى((استحوذ عليهم الشيطان فأنساهم ذكر الله))

طيب وعمليه زي دي اتعملت في مستشفى فين الرقابه ولا المستشفى الخاص عامله(( زي جزار بيدبح بره السلخانه))..

كل واحد بفلوسه يشتري على قد ما يقدر من الضماير المحليه ..(( أصل دي الحاجه الوحيده اللي ما ينفعش منها صيني )) و إلا كانت الصين خربت من زمان..

ده غير غياب الوازع الديني يعني الشاب ده مفكرش ده حلال ولا حرام..

ده غير زكاه المال اللي ما بتطلعش..

لو طلعت زكاة مال المسلمين كما يجب لما كان هناك جائع ولا بائع لأعضائه ولا حقير يستغل ضعف الفقير وربما كان هو الآخر ضحيه الفقر والشيطان معا..

والفلوس اللي بتتسرق وتتخزن في سويسرا..

والضمير والأمانه اللي العشره منهم بقرش هذه الأيام..

والوازع الثقافي..مفكرش هيعيش سليم ولا في خطر ..

يعني مش الحكومه بس السبب..

لازم كلنا نتغير..

قال تعالى((إن الله لا يغير ما بقوم حتى يغيروا ما بأنفسهم))

الموضوع من فوق ومن تحت.((.العكاز معووج من فوق ومكسور من تحت))

رحم الله عمر بن الخطاب رضي الله عنه ((لو عثرت شاة في الصحراء لخفت أن يسئلني عنها المولى عز وجل))

خاف أن يسئل عن شاة.....فنصف الرعيه

عامل الشعب كشاه..فكــنا الضحـــــيه

ربنا يلطف بينا....آمين

اللهم اهدي حكامنا وشبابنا إلى ما فيه الخير...
....................................................................................

زياده واجبه

امبارح كانت نتيجه الثانويه الأزهريه ..اللي أكيد (كالعاده) مش كتير يعرف عنها حاجه..
ولو فضلت اتكلم عن تجاهل الأزهر وعدم اهتمام الإعلام بيه مش هخلص ..وكان اتكلم عن كده صديقي في مدونته ((صبح صبح ياعم الحج))
المهم..اللي عايز أقوله ..
إن الأولى على الجمهوريه مجموعها 649.5/650
ما شاء الله لا قوة إلا بالله..ربنا يكرمها ويزيدها..
وعلى فكره ده صعب جدا لأن الأزهر 17 ماده بيمتحنوهم في 25 يوم (يعني طحن)..:
علمي علوم ورياضه في بعض..
يعني تستحق التهنئه فعلا...
ثانيا ..واللي هيشلني إن الناس فاهمه إن الأزهر ده مكان المتخلفين وكلياته حتى القمه منها بتاخد مجاميع في الأرض..
بدليل إن أختي السنه دي جابت (اتجزرت) 82% علمي..يعني متلحقش للأسف أي كليه عدله..
وفي عز محنا زعلانين (لأنها كانت مستنيه اسمها يتزاع من الأوائل وتخش كليه صيدله)وهذا الفرق الشاسع بين الأمل والنتيجه ليس مستغربا في الأزهر لمن يعرفه..
المهم في عز محنا زعلانين واحد يقوللي 82% الحمد لله هتخش الكليه اللي هي عايزاها ..لا تعليق.
واللي مش قادر أفهمه ومش راضي يخش دماغي ولا حتى بلبيسه..ليه الأزهر بيعامل ولاده كده..
ليه الناس بتعامل الأزهر كده..ليه آخدين عن طلبته فكره وحشه أوي كده..
أسئله شكلي هموت قبل ما أفهم إجابتها..
أو هحاول أفهمها ونزلكوا بيها بوست قريب..
ولا عزاء للأزهريين...