احفظ ..سمع

طبعا عارفين العنوان ده معناه ايه

والشعار ده بيرمز لإيه..

طبعا ده شعار التعليم في مصر..

مع إن أنا شايف إن إحنا ظلمنا كلمه تعليم لما أطلقناها عليه..

تعليم ازاي وعندنا الصغير أذكى من الكبير..

والشخص نفسه وهو في أوائل المراحل التعليميه أزكى منه في أواخرها..

تعليم ازاي والقدره على الحفظ هي السمه الرئيسيه للأوائل والمتفوقين..

أي نعم الحفظ هو قمة الفهم.. بس من غير فهم ..يبقى لا قمه ولا قاع..

زويل ياجماعه قال كلمه جامده في زيارته الأخيره لمصر..

قال إنه غادر مصر منذ ثلاثين سنه ومستوى البحث العلمي كان وقتها أفضل مما هو عليه الآن..

مش عارف .. إحنا ماشيين الطريق بالعكس.. ولا الطريق بيشد من تحت رجلينا لوره..

الحقيقه الاتنين صح..التدهور سببه جوه وبره..

لو حبينا نحسن الظن أوي بالجوه هنقول قله تفكير..((انعدام تفكير))..

أو بطريقه تانيه..مسكوا(....)مفتاح(....)..

أما اللي بره فده الطبيعي.. محدش يحب عدوه (أيوه عدوه) يبقى أعلى منه أو حتى تحت منه بمرحله بل بمراحل..

بالنسبه لينا حجة نقص الإمكانيات دي حجه فاضيه ملهاش وجود أساسا..

والدليل إن لما عملوا دراسه لمعدل الذكاء بين دول مختلفه بما فيهم احنا لقو إن المعدل تقريبا متساوي عند الصغر قبل بدايه مراحل التعليم..

الإختلاف الأساسي كان بعد قطع شوط كبير من التعليم في كل بلد.. كان المستوى عندنا يكسف..

أنا مقتنع جدا بالإحصائيه دي لأني مجربها شخصيا و للأسف أعراضها بدأت عندي ..

والدليا إن اللي بينفد بجلده ويكمل تعليمه بره بيوصل صح..علشان كده أغلب علمائهم من العرب عموما..

بس بيكون عالم بعد فوات الأوان بالنسبه لينا ..خلاص مش هينفع نستفيد منه..

ده حتى عندنا في الكليه..كان في دكتور بيشرح لنا مرض معين وبدأ يشرح في أسبابه النظريه((حفظ يعني)) .. وطبعا أفاض و استفاض.. وأطنب واستطنب..ولما وصل لجزئيه خطوات حدوث المرض وازاي بيحصل ((فهم يعني)) قال سيبكوا دلوقتي من الكلام الكبير ده .. يعني((احفظ متفهمش)).. ولما يسألك في الإمتحان عن الأسباب اكتبهم يعني ((رصهم)) ..

ولا عزاء للأذكياء..

هيطلع ازاي واحد يفكر ازاي يمنع أ يعالج المرض وهو مش فاهم هو اتكون ازاي..

مش بقولكوا..مسكوا((....))مفتاح((....))..

الحلول والله سهله ومتاحه بس نخلص ((يخلصوا)) النوايا..

ربنا يقدرنا جميعا على الحفظ والفهم معا..

ويصلح حال بلادنا وبلاد المسلمين..
آآآآآمين......

شكرا على الإهتمام نرجو التعليق