إحنا السبب

شعارات..تفرس

الأسبوع ده وأنا ماشي في قاهره المعز..

شفت (خير اللهم اجعله خير) شعارات جديده مكتوبه في الشوارع بطريقه واضحه..

الجمل دي بتقول((هي اللي بتقول))..

قبل لما نزيد مولود... نتأكد إن حقه موجود

نحكم عقلنا.. نستريح كلنا

نحكم عقلنا.. نشبع كلنا

نحكم عقلنا.. نشرب كلنا

نحكم عقلنا.. نتعلم كلنا

ايه رأيكم في الكلام ده..

محدش يقوللي ..((كلام جميل كلام معقول مقدرش أقول حاجه عنه))

هقولكوا إيه وجهة نظري..

الشعارات دي ياجماعه حسستني بالذنب..حسستني إن إحنا السبب في اأزمه الإقتصاديه والغلاء اللي احنا عيشينه..

بالنسبه للشعار الأول..((قبل ما نزيد مولود .. نتأكد إن حقه موجود))

فأنا مش قادر أفهم وجهة نظر سعادته بالضبط..

حق ايه اللي بيتكلم عليه..هو فاهم أبلا معنى الحق إيه..

معلش دي جت في الموضوع غلط..المهم.

.خلاص للدرجه دي ..وصلنا إن مولود هيفرق معانا..

ده حتى المولود بييجي بأكله..((رضاعه))..ومستغني عن خدماتنا..

وهيفرق معانا ازاي مش فاهم..هو ربنا حط في الأرض رزق لعدد معين من الناس ولما يكملوا نوقف العداد لحد ما نموت واحد من القدام ولا إيه..

وحقه اللي هوه ايه ..الأكل ولا التعليم ولا الوظيفه المستقبليه ولا شريك الحياه((بالمره..استعداد باستعداد بأه))ولا..ولا...

طب أنا حقي اللي جهزهولي فين..فين حقي.((.أنا عايز حقي))..أجيبه منين..مين اللي خده.. ربنا ياخ.....

طب بالنسبه لحقه في الأكل هنعينله عيش من أبو شلن ولا بريزه ولا...ولا جنيه..ولا نحجزله مكان في الطابور على ما يكبر يكون قرب يوصل للشباك...

وهنعينله أكل من اللي بمسرطنات ولا من غير.. مرشوش ولا بتاع تصدير((أصل اللي بره مابيحبوش المرشوش..يلا ملهمش في الطيب نصيب..مبيفهموش في الأكل))..المهم..ولا نعمل حسابه في حتة صحراء لما يشد حيله برده يبقى يحمرها.. قصدي يزرقها ..قصدي يسودها . . يووه(( معلش أصلي مش شايف غير الألوان دي)) أيوه يخضرها..

والميه بأه من أم صرف ولا من غير..معدنيه ولا حنفيه..الأحسن نشوفله مكان جنب مصنع من اللي(( بيطهروا)) النيل بفضلاتهم ويبقى منه للنيل عدل..

طب ده الأكل والشرب..أمال التعليم بأه .. لأن التعليم مهم جدا هوه اللي هيخليه يطالب بحقه اللي احنا عاينينه ومتأكدين أوي إنه موجود وإلا ما كناش جبنا المولود..

هنعلمه بأه في أنه نظام ثانويه..اتنين ولا واحد ولا تلاته..بامتحان متسرب ولا بغش جماعي..مدرسه برقاصه ولا من غير..ولا نسيبه جاهل عشان ميوجعش دماغنا((دماغهم)) كتير..

معلش طولت عليكوا بس الشعار يفرس بجد..

ده الكلاب والقطط ياجماعه ..بيولدوا من غير ما يعينوا حاجه ولا محتاجه ومع ذلك ما شاء الله اللهم صلي على النبي ولدهم بيكبروا وياكلوا ويشربوا ويتجوزوا كمان ((آه والله الكلاب بتتجوز))وبدري كمان ..

ولا الأرانب فدول بأه بيتهيألي إنهم لو ليهم جمهوريه ورئيس وكده كان ولع في كل الأرنبات اللي تخلف أكتر من أرنوب واحد ..

وكمان الشعار ده يتنافى ويتعارض ويتصادم (وكل حاجه وحشه مع الدين)..

أولا..قال تعالى((ولا تقتلوا أولادكم خشية إملاق نحن نرزقهم و إياكم))

ثانيا..قال تعالى((وما من دابه في الأرض إلا على الله رزقها))

ثالثا..قال عليه الصلاة والسلام حديث فيما معناه(تكاثروا تناسلوا فإني مباه بكم الأمم يوم القيامه)

رابعا..وقال أيضا فيما معناه(تزوجوا البكر الولود)

والسؤال اللولبي بأه..الصين كام.. ووصلت لإيه.. و إزاي؟؟؟؟؟

هسيبكوا انتوا تجاوبوا وتعللوا السؤال ده بنفسكو.....

اللي بجد بأه ممكن نعمله..إن إحنا نحافظ على حقوق بعض..وكل واحد سرق((بلاش سرق خليها أخد)) حاجه يرجعها..واللي في سويسرا يرجع مصر..كده..كل واحد هيكبر هيلاقي حقه وزياده..ويمكن كمان يلاقي حق ناس ماتت وملحقتش تخده((طبعا نصيبها كده اللهم لا اعتراض))..

باختصار الشعار كان لازم يتعدل شويه..

قبل ما نزيد مولود .. نرجع حقه(المسروق) المفقود..نتوكل عالرب المعبود..أو أي حاجه تانيه غير العك ده....

أما مجموعة شعارات تحكيم العقل...

نحكم عقلنا..(خد عندك بأه)نشبع..نشرب..نتعلم..نستريح..كلنا...

أنا بصراحه زهلت ..ياااه..احنا أغبيه للدرجه دي ..بقى غبائنا هو اللي جايبنا ورا السنين اللي فاتت دي كلها..مع إنهم كانوا بيقولوا المصري ذكي..

طب عقلنا ولا عقلهم ما جايز احنا اللي اذكيا وهم اللي....

ولا جايز قصدهم بالعقل كل ما يحكم تصرفات الإنسان من ضمير وحكمه و إيمان و...و....

وبرده مازلت مصر عقلهم مش عقلنا....

آخر مثال هقوله هو دليل على الخيرات اللي ربنا سبحانه حبى مصر بيها.. ودليل أيضا على إن اللي احنا فيه بسبب انعدام ضمير وأمانه اللي ماسكين خزاينها...

مين أأمن واحد مسك خزاين مصر؟؟

طبعا سيدنا يوسف ..

كان حال مصر ايه أياميها؟؟

كانت كل البلاد المجاوره بتيجي تاخد معونتها من مصر..عليه العوض بأه..

معلش البوست طويل شويه..بس الشعارات تستاهل أكتر من كده..

شكرا على الاهتمام ..نرجو التعليق..